प्रतिसाद

मी सांगितल्या त्याला

कथा, कहाण्या, गोष्टी

खूप... खूप...

शेकड्यांनी

कधी देवादिकांच्या,

कधी माणसांच्या,

कधी पुराणातल्या,

कधी कादंबरीतल्या,

कधी सिनेमातल्या,

अनंत रंगांच्या, ढंगांच्या

असंख्य आकारांच्या, प्रकारांच्या

`साद आणि प्रतिसाद'

हाच विषय असलेल्या...

एक दिवस तो

साद घालू लागला मला

अनावरपणे, अनिवारपणे

अलवारपणे;

मी कुठलाच प्रतिसाद दिला नाही

...... कदाचित मी सगळ्या कथाकहाण्या

विसरून गेलो असेन...

- श्रीपाद कोठे

नागपूर

मंगळवार, २४ जानेवारी २०१७

आजची कविता तुझ्यासाठी, फक्त...

आजची कविता तुझ्यासाठी
तुला thank you म्हणावंसं वाटलं म्हणून
अगदी मनापासून thank you
खरं तर आजवर जाणवलंच नाही तुझं महत्व
त्यासाठी sorry सुद्धा हं...
कुठेही जातोस, कुठेही राहतोस,
कसाही राहतोस
जसं ठेवलं तसं
कुठलीही कुरकुर नाही
घाण नाही, कचरा नाही
काटे नाही, गोटे नाही
जाळी नाही, जळमट नाही
मी म्हणेल तिथे, अन माझ्यासाठी
... पण, फक्त माझ्यासाठीच असंही नाही
जो जवळ करेल त्याच्यासाठीही
माझ्यासाठी करतोस, वागतोस, राहतोस तसंच
सगळं जग झाडू म्हणतं तुला
मीही म्हणतो, म्हणेन सुद्धा
पण आतापासून
एक कोपरा राहील मनात
`तो झाडू घे' म्हणतानाही;
वास्तविक तुझी अन माझी कहाणी
सारखीच आहे
पण आज मी तुलनाही नाही करणार
कारण मला ठाऊक आहे
तू काकणभर सरसच आहेस माझ्याहून
त्याच्याहून किंवा तिच्याहून
म्हणून आज फक्त thank you
अगदी निखळ, शुद्ध, सोलीव
thank you.

- श्रीपाद कोठे
नागपूर
बुधवार, ११ जानेवारी २०१६

आर्जव

आयुष्याच्या या वळणावर
आज पेटवू एक निरांजन
आल्यागेल्या पांथस्थाला
अंधारातील ते आश्वासन

अष्टदिशांनी येतील जेव्हा
अवसेचे कृष्णदूत धावूनी
आर्त मनांनी इथे म्हणावी
आत्मशक्तीची सुरेल गाणी

अवचित आल्या कृष्णनभाला
आतून द्यावी इथेच हाक
आषाढाने बरसून जावे
आणि फिटावी आदितहान

आसुसलेल्या पाखरनयनी
आशा यावी इथे फुलोनी
आडोशाला वितळून जावी
आजवरीची निराश वाणी

अद्भुत काही इथे नको रे
अजाणताही इथे संपू दे
आयुष्याच्या या वळणावर
आत्मतृप्तीची बाग फुलू दे

- श्रीपाद कोठे
नागपूर
रविवार, १ जानेवारी २०१७
(नवीन वर्षानिमित्त)