निराकाश

उजेडाचा हात हाती घेऊन
पुळणीतून चालताना
थबकलो अवचित
गुणगुणू लागलो
अविनाशी यक्षगाणी
उदासीन आनंदाची,
तिथेच बसलो वाळूत
मागून घेतले उजेडाला
थोडेसे आदिताल
अभयांकित आकाशासाठी,
आदिताल हाती देऊन
ज्योती विलीन झाल्या
अंधारात अंधारासाठी,
अंधाराच्या शिडीवरून मीही चढलो
आकाशाला खेव देण्यासाठी
आदितालाची आवर्तने करीत करीत
भेटलो आकाशाला
नाचलो, बागडलो
अन आदिताल आकाशाला सोपवून
मी निराकाश झालो
माझ्यातून माझ्यासाठी...

- श्रीपाद कोठे
नागपूर
बुधवार, ११ नोव्हेंबर २०१५