दिगंबर

थंडी, वारा, ऊन, पाऊस
लज्जा आणि सुशोभन
झालंच तर हौस
माझ्यासह आणखी कुणाकुणाची;
त्यासाठी पांघरलेले
कपडे, स्वेटर, मफलर, टोप्या
रेनकोट, कोट, हारतुरे
घड्याळी, अंगठ्या, दागदागिने
सुगंधी फवारे अन काय काय...
दबून गेलो पार त्याखाली
उकडू लागलं, घुसमटू लागलं
विलक्षण कासाविशी;
काढून फेकलं सारं काही
विलक्षण आवेगानं
अन नाचू लागलो अत्यानंदाने
दिगंबर होऊन;
दिगंबर शिवाच्या गाभार्यात
विरळ होत जाणार्या
सुगंधी धुपासारखा !!

- श्रीपाद कोठे
नागपूर
रविवार, ५ जानेवारी २०१४